BOSS

Amoy aircon ka ng lumabas
Dala ang briefcase mong itim
Limang oras ka ding nakipag-plastikan
Sa boss mo

Biyernes ngayon
Laya ka na naman
Kahit dalawang araw lang
Next week pa ang sweldo

May exam siya next week
Malapit na ang midterms
Gusto na rin niyang umuwi
Pero biglang umulan

Kailangan niyang dumaan sa Mercury
Tinext ka niya habang nakasakay sa jeep
Magkalapit lang pala kayo
Buti nagreply ka agad

Sa Calamba nalang
Mas maganda manood ng sine
Iiwanan mo ang kotse
Mas ok pa mag-bus

Isang gabi
Tatlong daan, tatlong oras
“Boss, mani
Mura lang”.



Jason Gavina

KANDILA

Sa pagkakataong ito,
Ang mundo ko ay madilim.
Sa kwarto ko’y nag-iisa,
Walang ilaw, ‘pagkat brownout.
Naliligalig sa init,
Sa dilim di makakilos.
Kandila lang ang kasama,
Kandila lang ang nasa isip,
Kandila lang, wala nang iba.

Liwanag niya’y nakakasilaw,
Pati gamu-gamo’y nahahalina.
Pwede bang sa gabing ito,
Mapasaakin ka muna?
Ako’y iyong tuksuhin,
Hanggang mapaso’t maluha.
Kaparis nang ‘yong natutunaw na butil,
Luha ko nama’y tumutulo.

Ang pambihira mong ningning,
Mistulang galing sa higanteng tala.
Nakahimlay sa kalawakan,
Tinitingala nang sangkatauhan.
Pwede bang ako rin ay tingalain?

Noong aking kaarawan,
Ikaw pa ang naging bida.
Nakatirik sa bertdey keyk kong
Bulaklakin at makulay.
Habang ako’y inaaliw,
Nang nagsasayawan mong apoy,
‘Sang kahilinga’y sinambit.
Kahilingan ko sana’y tuparin,
Dinggin ng Poon nating Maykapal.

O kandila kong giliw,
Ikaw lang ang aking ligaya.
Ikaw lamang at wala nang iba.
Isip ko’y kayang lituhin,
Puso ko’y kayang patibukin.
Sapagkat ikaw ang lang ang gabay,
Sa sanga-sanga niring landas.

Subalit ngayo’y may ilaw na muli,
Sa liwanag, dapat ka nang limutin,
Dapat ka na munang itago.
Ngunit sana’y iyong malaman,
Madilim ang aking mundo
At isip ko ay tuliro
Sa tuwina’y ikaw ay ‘di kapiling.


-- Aileen L. Rosales

ALKANSYA

Tatlong pilak na barya
Sa musmos di magkakasya
Wari ang ngiti’y abot tenga
kapag tumunog na ang latang alkansya

Hanggang kelan tataghoy ang bulong ng pangarap?
Mapuno lamang ang latang mapagpanggap
Tuwing maghahanap buhay ang bata sa estero
Abot langit ang kaba sa mga Berdugo

Tuhod ay nanginginig at nababaluktot
Nababasa ng pawis ang pagkayamot
Ang latang kinakalawang at nilalangaw
Pinagnasaan pa ng mga magnanakaw


-- Albert Paul A. Puncia

SA PILING MO

Ako’y isang dahon mula bundok,
mabintog, makinis, berdeng berde pa.
Nilipad ng hangin nang ‘di namalayan,
nalayo sa punong nagbibigay buhay!
Nahulog sa lupa, namuhay mag-isa,
hanggang berdeng kulay ay naagnas na.
Kinain ng lupa, tangkay lang natira,
Wala man lang lumuha nang maupos na.


-- Katrina Leslie C. Nicolas

LARUAN

Pumasok ka sa tindahan ng laruan
Upang hanapin ang iyong kaligayahan
nang ako ay makita, ika'y natuwa

Na para bang hindi ka na magsasawa

Nangakong magsisilbi nang makuha mo
Sa twina ika'y paliligayahin ko
Naging tapat ako't totoo sa iyo
At sa parte mo, inaruga mo ako

Humiling na sana'y wag mong limutin
Ang mga maliligayang sandali natin
Sapagkat sa loob ako'y natatakot
Na ako'y ibaon na lamang sa limot

Lumipas ang panahon, ika'y nagsawa
Ang mga tuwa'y napaltan na ng luha
Nang tumagal pa'y, ako ay ikinahon
Naghinintay na lamang na ako'y 'tapon


-- JR LAZO

PARES NG TSINELAS

Sa simula nang isinuot mo ako
Nung bagong magkakilala pa lang tayo
Marami ng narating at dinaanan
Sa maliwanag na pasyalan ng syudad
O kahit sa madilim na sinehan
Hindi mo ako nagawang iwan
Habang ako ay iyong tinatapakan.

Pagkatao mong mabigat aking pasan
Maaaring sing bigat ng sako ng bigas
O kahon-kahon na bulak man
Hindi ako namili kahit sino ka pa
Ako ay isang piping saksi lamang sa lihim nating lakaran
Sa maingay na patyo ng eskwelahan
O kahit na lumubog man sa putikan.

Sa mga oras ng aking paglalakbay
Makabuluhan man o lakwatsahan lang
Hindi ko namalayang pudpod na pala
Ang bahagi ng swelas ko na iyo ng kinaladkad
Pero gusto kong malaman mo
Na kahit anuman ang mangyari
Masaya ako sa pinagsamahan nating natatangi.


-- Marylet H. Ilagan

BATINGAW

Sa bukang liwayway aking nilulunggati
Sinag ng araw sa aki’y bumabati
Nilulukob ang buong kapaligiran
Binabalot ang buong sangkatauhan

Sa may tuktok ng altar matatagpuan
Animo’y hari ang kinalalagyan
Abot tanaw gusali at kabundukan
Abot kamay maging mga tala at buwan

Ngunit sayang din naman itong tanawin
Kung pakpak naman ang napagkakaitan
Hindi tulad ng ibong nakalilipad
Ako ay tila estatwang sawimpalad

Napakalamig kung iyong yayakapin
Walang init ang lumalabas sa akin
Sa ‘king katawang binubuo ng bakal
Purong kalawang ang sa iyo’y sasakmal

Kung kaya’t sino ang may lakas ng loob
Ang sa akin ay humaplos lamang sana
Sa biyaya ng Diyos sa tao’y lumukob
Tanging lubid ang siyang naging biyaya

Kapag ang lubid na ito’y hihilahin
Tanda na ito ng aking pangingilin
Ang impit na hiyaw ang mamumutawi
Babasag at gigising sa isang gabing
Puno ng nakabibinging katahimikan.


-- Anchilie G. Francisco

NASAAN SILA?

Ako’y isang kalapating nakatungtong,
Kasama ang iba’t masaya sa bubong;
Pinapanood ang pagsikat ng araw,
Habang nilalanghap ang umagang hangin.

Kasama ang iba’t sabay pumagaspas
Mga pakpak magkakasamang lumandas;
Makaraang lipad dumapo sa kable,
Nilamon ng mata terasa sa tabi.

Walang pang kisapmata’y dinakma ako!
Mga pasmadong kamay na sumasakal
sa dibdib ko’y sa loob dumadagundong,
Anumang pagpalag hindi pumipiglas.

Inakala kong sasaklolohan ako;
Tutukain nila hanggang sa dumugo
Lamang gumagapos sa’kin nang lumaya
Pero sa ligid ko’y sila’y malayo na.


-- Karen Kishia T. Fortu

KADENA SA LUPA

Pinikit ko ang aking mga mata
Dama ang pasanin sa dibdib,
Tila batong ikinadena ang puso sa lupa.

Sa pisngi dumaloy isang tulo ng luha
Itinaas ang mga mata sa kalangitan
Bumulong ng dalangin.

Init sa kalooban unti-unting dumampi
Puso'y marahang tumibok
Kadena pala'y nahulog na sa lupa.


-- Elegado

AKO'Y ISANG MALAKING BATO

Ako ay isang malaking bato
Sa ilalim ng mayabong na puno,
Gawa sa bagong halong semento
May krus sa ibabaw nito

Nakaukit sa aking harapan
Isang quadradong marmol
Animo perlas na nagsisilbing lakas
Sa gayon, masulyap ka bukas

Sa loob ng biyak at mga butas
Ay may teritoryo ng langgam
Kahit sa kasingit-singitan
Karamay ko sa tiis at hirap

Mabuti pa sila na aking kasama
Nandyan kahit sa pagluha ng ulap
Tunay silang kapamilya
Hatid ay malamig na ligaya.

Samantalang dako pa roon
May kapisan akong poon.
Nawa’y panalangin ay matugon
Sana’y mapawi ang lumbay

Naalala ko ang iyong itinirik
Kandilang nagbigay ng init
Naupos lamang sa aking paanan
Nagpasimula sa aking kalagiman

Sa kadiliman ay nabubuwang
Kabuuan ko’y kinakain ng lupa
Naghihintay na lamang ng sandaling
Mayayakap ang dumi at uling.

O kailan ulit mahahagkan
Rosas na palamuti sa ulunan?
O kailan ako muling matitinik
Kapag ito’y maipatog sa aking anit?

Nais ko na ika’y makasama
Makiramay sa’king pagkaulila
Sa ika-apatnapung araw
Inaasahan ang iyong pagbalik.


-- John David L. Comandante

BLUE MAGIC

Sa liwanag ng paligid ako’y nasilaw
Kakaibang lugar aking nadatnan
Nang may lumapit sa akin at inilagay
Ako mag-isa sa isang sisidlan

Isang dilag ang sa aki’y nagpalaya
Sa tagpong iyon nais ko siyang maging sinta
Sa bulak kong anyo nais ko nang kumawala!
Loob ng isang teddy bear may damdamin na pala.


-- Kevin Cham

GAMU-GAMO

Ako'y tunay na naakit ng iyong liwanag
Sa lamig ng gabi, ika'y nagmistulang lagablab
Alab na nagbibigay init at buhay
Sa aking kaluluwang nahihimlay

Ang iyong labis na pang-aakit ay di ko na matanggihan,
Kung iyong mamarapati'y nais ko sanang aako'y mapagbigyan
Ang makalapit sa iyo'y akin nang pangarap
Lahat hahamakin, makalasap man lang ng iyong pagsinta

Maalab, mahapdi, makamaandag...
Nakakasira ng diwa ang iyong presenya
Sa aking paglapit, kamatayan ang nakamit
Ngunit wala akong hinanakit
Pagka't ang makalapit sa iyo'y aking kaligayahan
O ilaw na mapang-akit ant mapagpanglaw.


-- Cherry Pinky M. Budao

MAY BAGA PA BA?

Mistulang yosi sa pagitan ng iyong mga daliri
Sa bawat hithit saya ay namumutawi
Dakilang pampalipas ng iyong oras ginampanan
Ako ay iyong yosi, tinaktak, napagsawaan, iniwanan.


-- Christopher Alexis A. Belison

BULAKLAK AT ULAN

Sa wakas! Sa wakas! Heto na! Heto na!
Ang aking daho’y sumasayaw sayaw na.
Mala-yelong hangin ang kanyang musika.
Ang pumpon ng bulaklak ko’y tumingala.
Nakikita ko! Langit ay paiyak na!
‘Sang kisapmata’y, luha nya’y bumagsak na.
Tubig na malamig ang dumaloy sa’kin
Dahon ko’y lumundag lundag sa sobrang tuwa!
Haaay! Uhaw ko’y pinawi niya.


-- Canlee Balmores

WANTED MAID

Sa may kanto ako’y makikita
Sa bawat bahay nakatala
Tumatanggap dalaga ma’t binata
Ako’y bitbit ng buong sigla.

Pagkalipas ng ilang buwan
Ibabalik na naman
Sa gate na tapat ng daan
Araw at gabi’y nahahamugan.

Buhay ay sadyang ganito
Tulad kong karatulang di maparito
Itsura ko man ay pabago- bago
Iisa pa din ang kahulugan ko.


-- Leona Alvina

EXTENDED

Naglalakad sang gabi
Tahimik humuhuni
‘Sang bahay napatapat
Nagulat, napangisi

Si pare ay may party
Sa alak di’ natanggi
Bukas may ipapasa
Aking report pano na

Lagi akong ganito
Pa’no na ang acads ko
Si nanay ay galit na
Pagtatapos kailan ba?


-- Jan Amiel S. Agustin

ULAN

Dumilim ang kalangitan
Dagundong ay biglang umalingawngaw
Ako’y sadyang binulabog
Na tila babala mula kay Bathala

Sa pagpatak ng ulan
Buong kapaligiran ay nabasa
At bubong ay nagkalampagan
Na wari ko’y lulugso sa lakas

Ikinumpas ko ang aking kamay
Sa maluwang na bintanang nakabukas
Ngunit ulan ay tila mailap
Sa aking kamy na tigang

Sa wakas tumila na!
Ako’y naganyak lumabas
at sa aking patingala
Bahagharing hudyat ng katahimikan


-- Flosa, Rico Anthony M.

KAMATAYAN

Ako'y dahon na nakalambitin sa sanga ng buhay;
Sumasabay sa indayog ng hangin;
Pinapainom ng ulan;
Araw ang nagbibigay-init;

Ngunit sa pag-agos ng panahon,
ang aking lakas ay lilipas;
Luluwag ang aking kapit
at tatangayin ng hangin sa kawalan.


-- Michelle Diana Lois H. Osias

SIPIT

Wari ngang ako’y isang tsinelas na lagalag;
Kahit saan itapak hindi papalag.
Patuloy ang paglalakbay
saan mang sulok ng daigdig,
damuhan,alikabok, at batuhan ay susuungin.

Manigas man yaring putik
sa aking talampakan,
Mapudpod man ang swelas ng tuluyan;
Talim ng bato’y kayang tiisin,
Huwag lamang ako’y hindi pansinin.

Kulay kong matingkad man ay kumupas,
Talampakan ko man ay butas.
Pangarap lamang na swelas ay ginto,
Iingatan masugatan pati ang dulo...


-- Maricris P. Madeja

PASADOR

Nakakapanghalukipkip
Wala man lamang ni silip.
Linggo't b'wan na ang binilang,
San na likidong masangsang?

Hanap ko ang iyong init
At dugong nangunguyapit.
Hindi na ba kumikirot
Ang puson mong haliparot?

Ngunit dinig ko 'yong hikbi
Ramdam mo pa rin ang hapdi.
Dulot ba ng b'wanang dalaw?
O ng sanggol na pumanaw?


-- ruby chanda j. jetomo

SARANGGOLA

Ako ay saranggola
May pisi sa tuwina,
Hangin ang nagdadala
Kung saan man magpunta

Makalipad sandali
Ang aking minimithi
At nang ito’y namithi
Hanggang langit ang ngiti


-- Rodelin Ellaine M. Galvez

MAY MGA ORAS NA NAAALALA KA

may mga oras na naaalala ka,

mga minuto na iisip ka
pilit ginugunita
mga alaalang pilit mong ibinaon sa lupa

marahang inaawit,
ang mga letra at salita ng yong kanta
walang pakundangang ginigipit
mga emosyong sobrang lupit

di magapi
memorya mo nung ikay nasa piling ko
di makalimutan
bawat kanta ay lalong naliliwanagan

walang aberya at iyong inilayo
ang puso mo noong pilit na itinatago
sinubkan mo man itong ipamahagi
ngunit sa puso ko, ikaw parin ang naghahari

pinilit mong na tayoy magkaganito
pero alam ko na ito'y di mo gusto
hadlang satin ay ang pangamba mo..
pero bakit, di pinagkaloob ang tiwala mo?

ngayon, puso ko'y iniwan mo sa pagkalito
di man lang binigyan ng idea kung bakit nagkaganito
pero hayaan mo, hanggat nabubuhay ako
nandirito parin ako para sayo..

--bilang kuya mo...

-- Monchie P. Fradejas

PLUMA

Hawak ako't
Nilapat sa bawat papel
Upang panulat
Sa bawat salitang nasasaisip
Ngunit hindi masambit.
Alay ang dagtang
Tanging nagpapasilbi
Sa isang plumang di mamahalin.
At nang maubos ito'y
Nawala rin ang halaga.
Ang kamay na humawak
Ay bumitiw
At


-- Bessy Lou Lustiva-Espina

PASUKOB

Ang hawakan ko'y hawig ng isang candycane,
Kulay labanos sa aki'ynakabalot.
Parang isang papel na madaling masira,
Ako'y natitiklop na parang makahiya.

Sa mapaglapnos na sikat ng araw,
Sa nakasisipong buhos ng ulan,
Ako ay parang isang superhero,
Mala Batman kung ika'y ipagligtas.

Di man gaano napapansin pareho ang aming importansya,
Kung paanong minsa'y ikay ipinagtanggol at prinotektahan,
Kaya pag kami'y tuluyang nawala at nasira,
Itatapon na lang at kakalimutan na.


-- Arjay Dimaano

PINAKAHIHINTAY

Ako’y binubukbok na sa pagkakatayo
Sa humuhunang pagkakakabit
Hindi ko masisi ang mga bisagrang kinakalawang
O ang mga anay na gumagapang at nanginginain hanggang aking kaloob-looban
Nang kumaripas na ang hanging nangangalit
Buong lakas na humampas
Dumagundong
Nawala ang langitngit
Sa pagkakakalog ko,
Ang nakasabit sa aking larawa’y lumalaban at nagpipilit na di malaglag
Ang mga anay sa aking loob ay nagtutulakan
Kaunti pa’t malalasap na aking pagbagsak.


-- Shara T. Colegio

BULAKLAK AT ULAN

Sa wakas! Sa wakas! Heto na! Heto na!
Ang aking daho’y sumasayaw sayaw na.
Mala-yelong hangin ang kanyang musika.
Ang pumpon ng bulaklak ko’y tumingala.
Nakikita ko! Langit ay paiyak na!
‘Sang kisapmata’y, luha nya’y bumagsak na.
Tubig na malamig ang dumaloy sa’kin
Dahon ko’y lumundag lundag sa sobrang tuwa!
Haaay! Uhaw ko’y pinawi niya.


-- canlee

ISMAGOL

Naaalala ko pa, ako’y laging kasa-kasama
ng isang paslit na aking napahanga
Bagong-bago, matibay, makulay at murang-mura
Ito ang mga katangian kong naibigan niya.

Kaya nga’t sa ina’y namimilit pa
Hindi uuwi hangga’t ako’y hindi nakukuha
Tiyak na sa susunod na araw
Mga kaibigan ay mamamangha.

Saan man siya magpunta
ang iiwan ako’y di magagawa
Kahit sa paglalaro, habulan o tumbang-preso
ako ang nagpapanalo.

Alagang-alaga, hidi pahihiram sa iba
Sa mga lakad ay dapat laging dala-dala
Ngunit noon ‘yun,
Ngayon ay hindi na.

Sa ilalim ng marupok na kamang ito
Sa banding sulok na hindi masilayan ng liwanag
Kung iisipin ay matagal na rin
matagal na panahong ako’y iniwan ditto

Katawan ko’y kinakapitan ng alikabok
Sa mga singit ay binabalutan ng putik
Pakiramdam ko ay masikip
dahil sa mga duming sumabit

Amoy na hindi kaaya-aya
Kahit sino man ay hindi magtitiyaga
Kakambal ang isang basura
Tunay na kahiya-hiya.

Sa gabi ay kapiling ko
itong mga daga
Ako’y napapapak sa kagat
Buong magdamag ako’y ningangatngat.

Mga insekto ay pinamamahayan ako
Lamok, langgam o mapa-ipis man
ako ay walang kawala
Ang tulad ko ay may pakinabang pa pala

Ang mga gilid ay nawalan ng porma
Gomang tuluyang napudpod na
Kailanman ay hindi na maisusuot
Nanaisin pang ako’y ibaon sa limot.


-- Roxam Marie M. Borras

D'YAN LANG

Sakay na! sabi ng Mama!
Umakyat siya, sa kaliwa.
Itinaas niya sa upuan ang kanyang mga paa,
Matutuyo naman daw ang buhok niya eh.
Nabanaag niya ang kabundukan;
Sumisigaw ang mga puno;
Umaapaw ang mga sanga;
Nagpapalit ang mga senaryo bawat segundo.

Ito na naman pala ako,muli;
Malululong na naman sa gasolina sa istasyon ;
May mauuntog na naman sa ilawan ko sa itaas ;
Mamumura na naman ako;
Dudulasin ko naman sila sa akyatan kapag umuulan ;
Malalanghap kong muli ang palda ng estudyante;
May nakadikit na kanin, nagmamadali na naman.

Aking napagtantong hindi parin ako preparado;
`Di matanggal ang trapal sa gilid ko ;
Napapaisod pa rin sa biglang preno ;
Napapaaray pa rin sa bawat angat ng pwet ko;
Nakakain ang buhok ng katabi ko;
Nagugulantang sa pagsayad ng transmission support.

Kinabayo na sa kakatawa ;
Sa mga nakasulat sa aking saya;
“Katas ng Saudi” at “God bless our trip”;
Basta sexy libre daw;
Nagpupulbos, pa-MP3, at tsismisan;
Napaling ang aking mga mata sa nag-abot ng bayad;
Amoy damo ang dibdib niya;
Naaalala ko siya, Naaalala ko siya.


-- Dalton Erick S. Baltazar

BAHAGHARI

Matapos ang mahabang pag-ulan
At bahagyang pagdilim ng kalangitan
Ako ay biglang magpapakita
Upang sari-sari kong kulay ay maihandog.

Ako ay si bahaghari
Panandaliang maghahari
Upang ang kalangita’y bigyang buhay
Matapos ang mahaba nitong pananamlay.

Isang arkong sa paraiso’y magdadala sa’yo
Mala sorbetes na sa mata’y nakaiingganyo
Ang aking dating ay sinamahan pa
Ng mga notang sa paligid ko’y tumatalontalon.

Isang pangako ang aking hatid
Mula sa lumikha ng lahat ng nasa paligid.
Kaya nga ang aking pagdating
Ay inaabangan ng marami.

Mabaligtad man ang mundo
At ako’y biglang mapaupo
Ako pa rin ang bahagharing
Nakangiti sa iyo.


-- Hannah Ruth C. Arcenal

SA MULI

Nagulat ako sa iyo,
Narinig kasi kitang nagwika,
"Ano ba 'yan? Heto ka na naman!"
Akala ko kasi masaya ka naman.

Oo, andito nga uli ako.
Ngunit di dahil palungkutin ka.
Dumaan lamang ksi akong muli
Para lamang sulyapan ka.

Naisip ko kasi na masaya ka
kapag ramdam mo ang prensiya ko,
Kagaya nalang nung isang araw
na ako ang karamay mo.

Pero ngayon siya ay muling
dumating sa iyong buhay,
Ako ay iyo ng itinataboy,
at bigla na lang kinalimutan.

Pero kahit papaano,
masaya ako para sa iyo.
Muli ay nasa iyo ng tabi ang araw
na matagal mo ng pinakahihintay.


-- Jona May M. Alcazar

NAGMAMASID

Nagmamasid sa isang sangang marupok
Nang ang ulan naghabulan sa may tuktok
Init ng bolang apoy sa kailangitan ay wala
Kundi madilim na ulap ang siya kong nakita
Lamig ng hangin ay sa mga dahon humahaplos
Ang kanal naman tila masayang umaagos
Berdeng lumot siya ring nagsulputan
Saka maglalaho pag tumila na ang ulan
Pagkatapos nitong pagbuhos
Saka na lamang mabubuksan ang pakpak ng lubos


-- Kathleen S. Acosta